باركولي

باركولي نزلت عسكور في الجيش من ظابط يا حلولي يا حلولي

الحمد لله رب العالمين كده عبد الرحمن ما يقدرش يغيظني لانه نزل عسكري قبلي

بس الحمد لله

اسيبكم واوعدكم اني هاظبط مدونتي الحمضانه دي شويه يا اما الغيها بلا قرف

حكرشه

والله واتحكرشنا ودخلنا الجيش يا سلام علي العيشه ولا الصول سيد ( ماريو ) ولا طابور التعذيب وفترات التعذيب الاولي ياسلام يا سلام انا مش هاقول حاجه المرة دي بس الحاجه اللي انا هاقولها بس ان كل اللي يقابلني يقولي انت وزنك زاد بعد ما دخلت الخيش هو اللي بيدخل الجيش بيزيد ( قل اعوذ برب الفلق )المرة الجاية هتستمتعوا فابقوا معنا

هادخل الجيش

يا حلولي يا حلولي وهادخل الجيش وكمان ظابط

ايه مش مصدقين لا صدقوا انا كنت زيكم مش مصدق بس هنقول ايه

الحمد لله علي كل حال ونعوذ بك من حال اهل النار

بس والله يلا اهي تجربه بس الحاجه اللي غايظاني

انهم مش عارف والله اعلم هبل ولا ايه

انا عايزك تقولهم يا ابو صلاح ولا انت يا عمر ولا هاقولكم قولهم يا ابو هاشم ولا يا محمد يا حامد

ولا هاقولكم هما بيصدقو الناس بتوعهم قلهم انت يا محمد قمر الدوله ( ظابط امن الدوله بتاع الجامعه )

ولا قوليلهم انتي .....................

ولا بلاش احسن حد يزعل

بس والله الحمد لله هاكون مع عبدوا حبيبي وعليبه وهنعمل احلي شغل

جلسات ولقاءات بس الحاجه اللي هتفرق ان احنا هنمشيها من غير منهج هيصو يا عم ما فيش تحضير

وربنا يسترها علشان دماغنا خسرانه شويه ويمكن نعمل تنظيم جوا

بس خلاص قررت قرار خلاص من غير رجعه ان الخطوبه قبل الجيش ومش هاصدع دماغكوا تاني باي حاجه في الموضوع ده

انا داخل يوم 21/4 وان شاء الله هاخطب قبلها

وادعولي امي تلين دماغها وبلاش ترجع في كلامها وما تجيش الشبكه

انا خلاص داخل الجيش وهتبقي حلولي يا حلولي

واقولكم سلام قبل الزحام

واحتمال اغير اسم المدون واسميها ظابط اخواني

سلااااااااااااااااااااااااااااااااااااااااااااام

اليوم يوم ميلادي

اليوم يوم ميلادي يوم عجيب

4/4/84 يوم الاربعاء الساعه 4 والنهارده 4/4/2008 يعني كملت 24 ايه التاريخ اللي كله اربعات ده بس مش عارف اليوم ده بافكر في ايه

1- اتجوز

2- اجيب عربيه

3- افتح شركه مقاولات واكبرها ويكون معايا احمد حمدي صاحبي

4- حاجات تانيه مش عايز اقولها دا الوقت

دي هي امنياتي المتواضعه في السنه الجديده لي

ياه كملت ال24 ياه دا انا كبرت قوي طبعا ناس كتير كانت ناسيه اليوم ده بس انا افتكرته بس من 4 ايام امي بس اللي كانت فاكره بس اول واحد قالي كل سنه وانت طيب اخويا احمد ربنا يكرمه ببنت الحلال اللي تريح باله

سنه جديده في حياتي مليانه بالحاجات الحلوه بس مش عارف ايه منها هيتحقق وايه مش هيتحقق العروسه اللي انا عايزها بعد ما ربنا حل معظم مشاكلها

هانزل لابويا واخلص معاه الموضوع كله بس بصراحه كان اتعب مشوار في حياتي

يارب تكون سنه خير علي وعلي كل اللي بيحبوني وعلي كل اللي انا باحبه وعلي كل الناس اللهم امين

انا في اليوم ده عايز انسي اي حاجه وحشه زي الحكومه مثلا

او حسني وولاده

او نظيف واعوانه

وحتي عم عبده تلوث بتاع الكبده

عايز انسي اي حاجه وحشه اي حاجه مش طبيعيه

انسي اي حاجه غريبه اي حاجه مش كويسه

انا عايز انسي انسي حتي اي اسم فيه تشائم

عايز انسي حتي مدونة اسخر بتاع الواد ابراهيم صاحبي

عايز انسي مدونة التهمة مصريه ما فيش دماغ

انسي ان انا داخل الجيش كمان 17 يوم انسي اي حاجه تعكنني

كفايه كده علشان شكلكم نسيتوني ومش هافتح غير مدونة انسي

مش عارف

مش عارف انا ليه باقول مش عارف بس فعلا مش عارف انا ما احبش اقول مش عارف بس للاسف اضطريت اقول مش عارف ساعدوني ان انا اقول انا عارف علشان دا الوقت مش عارف اقولها ....

انا اليومين دول بامر بضغط عصبي ونفسي ما هاعرفش اوصفو بالكلمات لدرجة انا خايف يجيلي شيزوفرينيا

بس هاقول ايه هارجع اقول مش عارف الموضوع باختصار بعد خلاص ما بدات اقول ان الموضوع بدا يخلص ويتحل فجاه ومن غير حسابات بدا يتعقد ....

عارفين الموضوع طبعا اللي انا كتبته باسم باحبها في اول يوم في السنه اللي كتبته في اول يوم في السنه انا عارف ان فيه ناس هتقول ايه الهيافه دي احنا في ايه ولا ايه ..؟؟؟؟

يا عم اليومين دول فيه موضوع غزه .... وفيه موضوع انتخابات المحليات ؟؟؟

وانت بتفكر في ايه ... هاقولكم اعذروني لان الموضوع شديد وصعب علي

هما موافقين وما فيش مشكله بس للاسف ده عنده راي وده عنده راي وللاسف ان انا لو اخترت واحد منهم يبقي بافرط في التاني وللاسف لازم اخد قرار اعمل ايه مش عارف ؟؟؟؟

ده حريص علي حاجه وده حريص علي حاجه وده مصر عليها وده مصر عليها

وده ليه اسباب وده ليه اسباب وللاسف ان نا لو ما اخذتش قرار يبقي انا باخد قرار

ان انا اسيب حاجه فيهم

انا حاسس انكم مش فاهمين حاجه بس اللي فهم او استنبط من الموضوع ده والموضوع اللي فات يقولي علي حل ارجوكم ...........

علشان مدمر نفسيا ومش عارف افكر

اخرتها ايه يا ريس

اخرتها ايه يا ريس ناس بتموت وناس مش لاقيه حاجه ومرضي مش لاقيين العلاج واطفال تتضرع من الجوع

فالي متي يا سيادة الرئيس
اين القلوب الرحيمة التي تلبي نداء الضعفاء والمساكين
رحم الله عمرا الذي قال اذا تعثرت دابه في الشام لسال عليها عمر لما لم تمهد لها الطريق
ومن لا يهتم بامر المسلمين فليس منهم
الي متي يا سيادة الرئيس تتعلق باوهام اليهود والامريكان
الي متي يا سيادة الرئيس تلهث ورائهم
الي متي يا سيادة الرئيس تغير الخيار
اقصد الخيار الاستراتيجي يعني السلام يعني
الي متي يا سيادة الريس تترك اهل غزه كذلك
يطالبوك بشيء بسيط وهو فتح معبر رفح
الي متي يا سيادة الرئيس يظل قلبك متحجرا
الي متي ياسيادة الرئيس تترك الفاسدين يتحكمون فينا
الي متي يا سيادة الرئيس تتذكر ان لك يوم ستقف فيه اما الله ليسالك عن هؤلاء المسلمين
الي متي يا سيادة الرئيس يتحرك قلبك لنصرة اخوانك المستضعفين
يا سيادة الرئيس المبجل ان ابيت الا السكوت والصمت فاعلم ان الطوفان علي وشك ان يتحرك في اتجاه الجميع وان الكيل قد طفح
ولا تستغرب في هذا الاوان لماذا اتي الطوفان لان الجميع يغلي من الداخل
فالي متي الي متي يا سيادة الرئيس
ان ابيت الا هذا فارحل عن ارضنا فانا لا نريدك لا نريدك لا نريدك

فارحل طوعا قبل ان ياتي يوما ترحل فيه كرها

باحبها في اول يوم في السنه

فكرت كتير جدا قبل ما اكتب المقال ده اكتبه ولا لأ .....؟؟؟؟؟

فقررت ان انا اكتب بس ابدأ بايه قلت مش مشكله زي ما تيجي البداية

المشاعر عندنا ساعات بنتكسف منها وبنخبيها خصوصا الحب

الكره ممكن واحد يقول انا باكره فلان او مش مستريحله

لكن ان الواحد يقول انا باحب فلانه الموضوع بيفرق قوي انا معاكم في كده وانا قبل ما اكتب ده كنت متردد بس قررت ان انا اطلع اللي جوايا وافضفض معاكم مش عارف ليه بس اهو قررت

مش عارف هو الموضوع ده فعلا بيلغبط ويخلي الواحد يسرح

ولا ده وهم المفروض الواحد ما يفكرش فيه اهو اللي حصل

المهم الموضوع ده زمان الي حد ما كان زي ما تقولو افكار بتروح وتيجي

بس دا الوقت مش عارف اخدت مرحلة تانية

انا باحاول ادخل في بحر تاني هو بحر خطوبه

وعلشان اكون صريح معاكم انا والله فعلا باحبها

اه اكيد ناس هتقولي اظفر بذات الدين واي واحدة ذات دين اتكل علي الله

ما هي صاحبة دين برده وكمان هي اخت من الاخوات

الاقي اخويه بيقولي فيه واحده كويسه ومتدينه واخلاق

مش قادر اقوله ان مش دي المشكله عايز اقوله ان القلب مش مستريح

بس احيانا فيه مشاعر ما باقدرش اقولها لحد

لوقعدت اتكلم واقول ان دي بتمثلي في حياتي ايه ممكن ما تصدقوش بس هاعمل ايه

فعلا باحبها

انا لما بافكر فيها باسرح كتير قوي

انا قلت لازم اقطع التوتر ده كلمت ابويه وامي وقالولي اتكل علي الله دي والله تمام

بس لما اتكلمت مع اهلها مش عارف انا اتوترت اكتر مش عارف ليه

هو لسه ما خلصش الموضوع

بس ادعولي باذن الله هيخلص

مش عارف انا اظن نفسي قوي

بس لما بدات اتكلم في الموضوع ده حسيت نفسي ضعيف مش عارف ليه

بسم الله ماشاء الله

هي اولا مش كبيره قوي هي لسه في الجامعه

بس تتكلم كانها مثقفه كبيره جدا

تتحرك كانها شعله

بتفكر كانها ما فيش حاجه عندها غير التفكير

مش عارف حتي مش عارف ايه

اسمها هو نفس حروف اسمي

ادعولييييييييييييييييييييييييييييييييييييييييييييييييييييييي

تعبان والله

كله تمام

اليومين دول تقريبا مش عارف الجماعه مريحين ليه يلا مش مشكله

بس فيه مشكله انا باقول كله تمام انا حاسس ان الناس بتتكلم بعقليه كويسه وبتحليل كويس خصوصا في موضوع الدكتورة رشا وانا من رايي ان نعمل زي فريق عمل بين المدونيين نتكلم بموضوعيه اكتر ونحط اجندة عمل مش كله يتكلم في اي موضوع والحصيله صفر فده من رايي مش كويس لاني حاولت اعمل ده بس لقيت ان الموضوع مش مفيد بدرجه كبيره علشان وانا مستعد اناقش معاكم بموضوعيه كويسه ولا سلام بقي علشان ما اطولش

عالم فاضيه

بصراحه انا كنت واخد فكره سلبيه عن التدوين عموما بالصورة اللي بعض الاخوة الافاضل اشتغلو بيها في التدوين

وبصراحه ما كنتش عايز ادخل الطريق ده بسببهم

واحد امور يقول انا كنت في لقاء ومسئولي قالي كذا وانا قلتله كذا راح رد علي ورديت عليه ... وكلام من هذا القبيل

الكلام اللي ما يفيدش حد

بصراحه لما قررت دخول الطريق ده من احسن المدونين اللي شعشعو جو دماغي اختنا اروي الطويل

واروع تدوينه عمرت الطاسه تدوينة د/رشا مع اختلافي مع مسئول التربية عندنا في الشعبة

وحبيبي ابراهيم ابوسيف بس زعلان منه من اسم مدونته مش عارف مش داخل نفوخي اسم اسخر ... مش عارف ليه ادخلو يمين مش عايز ادخلوا شمال مش عايز مش عارف ادخلوا ازاي

بس عجباني والله يا ايما

قررت ان اكتب واكتب واكتب مهما كانت العواقب

في الاول كنت هاكتب عن الخنقة اللي الواحد عاشها في فترة وجودي في جامعة المنيا بس قلت ليه يلا ندخرها للثواب

فقررت ان اكتب بعنوان انا مش معاهم في الحاجات اللي انا شايفها مش مظبوطه لكن معاهم في الصح طبعا دول هما حبيبي واللي هيساعدوني علشان ادخل الجنه فاستعنا بالله

ونشد خيلنا ونبدأ نشتغل

الاخوان وسياسة النقض الدائم

انا اخوان اه قبل ما اتكلم في الموضوع بس لازم اقول حقيقة انا من غير الاخوان ما اساويش حاجه وباحب الاخوان جدا اينعم ما حضرتش جلستي من فتره بس اكيد هما ملتمسين ظروف شغلي

الموضوع علشان ما اطولش عليكم انا الحاجه اللي انا شايفها مش كويسه النقض اللي علي طول خصوصا في طلبة الجامعه تيجي ادارة الكلية تشطب اسماء من اتحاد الطلاب تحصل كوارث ومصايب اتغلبو علي الظاهرة دي السنه اللي فاتت وعملو اتحاد حر اينعم في حتت كتير ما عملش حاجه بس وسيله حلوه

لكن نعمل اعتصامات ومظاهرات ويكون هو ده المصيبة والطامة الكبري لكن فيها ايه لو مشينا سياسة الطلبات دي حقوقنا ولازم ناخدها اروح للادارة واقولها انا حقي ده وعايزه من غير انا اخوان ولا غيره رفضت احتج اه عليها

وعموما انا من الرافضين للعمل التحزبي داخل الجامعه اخوان .... ناصري ..... تجمع ..... وغيره

انا عايز الناس كلها تشتغل تحت راية واحدة وهي العمل الطلابي دون تدخل من احد الا للنصائح ولكنه عمل طلابي يعده الطلاب بانفسهم كما يحدث في اللجان الطلابية في الاخوان وانا عشت هذا ولكن يعمم ذلك ليكون الطلا ب هم اصحاب الفكرة والقرار

وللموضوع بقيه

صحيت من النوم

صحيت من النوم خير اللهم اجعله خير ...

انا اكتر حاجه باكرهها الحسابات

انا شغال مهندس وكل اسبوع باقبض الناس واحاسبهم فكان فيه مره واحد كان ليه فلوس واديتو ميعاد ولسوء حظه انه ما جاش ولحسن حظي برده انه ما جاش لاني ما كانش معايا فلوس ... قلت الحمد لله خلصت من واحد .....

في نفس الوقت واحد تاني قعد يرن علي برده ليه فلوس ما هو كلهم بيهلو في وقت واحد ....

يرن وانا ما اردش .... يرن وانا ما اردش....

فجاه لقيت واحد بيديني تليفونه بيقولي كلم فلان اتاريه هو .....

قبل ما انسي ....

ايه صحيت من النوم

المهم انا نمت وقلت الحمد لله عدي اليوم عمال ما اليوم الجديد يبدأ يكون الساعه جات 12 نكون جبنا فلوس من البنك

فجاة الساعه 6 الصبح الموبيل بيرن.... صحيت من النوم بابص في الموبيل الاقيه اللي ماجاش امبارح طبعا ما رديتش انا عبيط ...

قعد يرن ازعجني برده ما رديتش

الاقي واحد بيصحيني بيقولي فلان عايزك بره...

اتاريه الراجل اللي ما جاش امبارح

طبعا قلتله قله يعدي علي اخر النهار

وده اكتر حاجه تعبتني

وسلام بقي

انا مش معاهم

انا سميت المدونه دي بالاسم ده مش علشان الفيلم

لا خالص انا سميتها بالاسم ده من شعور بالخنقه وما حدش يفهمني غلط مش الخنقة منكم

انا في البداية اخوان وباحب الاخوان وما اقدرش استغني عنهم

بس باختلف معاهم
وده مش عيب
انا مش معاهم في الحاجات اللي انا شايف انها مش تمام
لكن معاهم في الحاجات التمام